Kirchenkonzert Jodler Doppelquartett Langenthal vom 18. November 2023
Schön esch euses Chelekonzärt gsii am Samschtig, de Gaschtklub ond das darf me säge, oder besser schribe, eusi mettlerwile liebe Kammeradinne ond Kammerade vom Jodlerklub Roggliswil.
Schöni Lieder hemmer vortreit i beidne Klüb, ou e Vortrag vom Sextett vom Roggliswiler Klub hez no gä, de het no 2i mou e Gsammtchor gsonge, das esch scho grad es Vollume gsii met 38 Sänger ond Juzer.
De Sandro Rieder het eus of de Cheleorgele begleitet, Sandro danke 1000 :-) es esch so cool gsii met Der ond Der döfe zue z lose, gärn es andersmou weder.
Ou de Franz Flückiger het met sine Kammerade of de Handorgele euses Konzärt bericheret, i de Chele ond im Forum Geissbärg, danke ou der Franz ond dine Kammerade es esch schön gsii met euch.
Nachem Konzärt esch es de zom gmüetleche Teil öbere gange, met Spies ond Trank ond Gsang, schön esch es gsii.
Danke liebi Kammeradinne ond Kammerade vellecht benere andere Glägeheit weder, das wördi s Jodler Doppelquartett sehr freue.
Liebi Jodlergrüess
Sändy
Jodler - Reise vom 27. August 2023
Am Sonntigmorge händ mer eus aui ofem Parkplatz bem Parkhotel in Langenthal of die 08:00 Uhr Besammlet.
De esch es los gange met eusem Car wo de Ueli gstüret het.
Mer send of Cully gfahre ond hend de erschti Stop imene härzige Kaffi gmacht, es het ou feini Croissant gä.
Mer send de nochli am Genfersee entlang gloufe bes mer weder bem Car gsii send. S Wätter esch optimau gsi, ned z heiss on tip top zom Reise ou wenn s mou e paar Tropfe Räge gä het, de semmer meischtens scho weder im Car ghöcklet :-).
De esch eusi Reis witer gange of Chexbres, det hemmer döfe e Wi Degustation mache be de Christelle Conne, eres Wiguet heisst Champ de Clos.
Es esch sehr Intressant gsii ond verwönt semmer worde met ere feine Ufschnettplatte ond fröschem Brot, herlech.
5 Wisse Wi ond am schloss no ei Rot Wi hend mer döfe Degustiere, es esch super gsii.
A dere Stöu de Christelle nomou es riese dankeschön för aues, es esch auso e Reis wärt.
Nach de Degustation het jede wo het möge, no es paar Schrett chöne loufe.
De esch eusi Reis witer gange of Cully is Chaplins World, die wo hend möge, me het aber ou eifach es Käffeli chöne nä ond nochli zäme höckle.
De letschti haut esch de in Greyerz gsii. Mer send dete im Restaurant Auberge de la Hall go Fondü ässe wär het möge, me het aber ou öpis anders feins öbercho we der of de Fotis gsänd.
Schön esches gsii ond sehr nätti Bedienig, ou dene nomou es Danke för aues.
Nachem Znacht semmer de ofe Heiwäg, aui send müed gsii vo dem Tag. Es esch zemmli Ruhig gsii im Car ofem Heiwäg :-).
Acho send mer de aui guet ond Gsond of die 20.15 Uhr in Langenthal. Ond womer de usem Car usgstege send, semmer no met eme Wonderschöne Oberot verabschedet worde.
Danke Andreas för die schöni ond spannendi Reis wo du för Eus aui Organisiert hesch.
Liebi Grüess
Sändy
Auftritt im Meilenstein 20.08.2023
Höt hend mer dörfe im Meilestein in Langethal am Brunch Senge. Mer hend 3 Uftrett gha, a 2 Lieder.
Brunche hend mer ou no döfe i de Pause, mer hend Förschtlech gässe, es het aues gha was s Härz begehrt.
Danke nomou a dere Stöu am Team vom Meilestein för aues.
Mer döfe am 22. Oktober 2023 nomou go Senge am Brunch.
Liebi Grüess
Sändych
Haslibrunnen - Gottesdienscht
Schöön esch es gsii am Gottesdienscht im Haslibronne z Langethal döfe z Senge.
Gstartet händ mer met em Lied, D Lüt im Dorf do het die einti ond anderi Bewohnerinn ond Bewoner vom Haslibronne chli Träne i de Ouge gha.
Weme am Text zuelost, de het me de scho öpe mou Erennerige a d Jugendzit!!
S letschte Lied wo mer händ dörfe Senge esch e Gschänkte Tag gsii, i ha vöu Bewonerinne ond Bewoner gse met em Chopf neke,
i dem Auter esch e Gschänkte Tag sooo wärtvou.
Mer hend ou vöu schöni Komplimänt öbercho vo de Bewonerinne ond Bewoner, för euse Gsang das freut eus emmer bsondrig.
Verwönt semmer de ou no worde, mer hend döfe nachem Uftrett Zmettagässe, es het e grossi Uswau gha ond esch sehr fein gsii.
Danke nomou of dem Wäg as Haslibronne Team för aues.
Mer chöme sehr gärn weder.
Liebi Grüess
Sändy
1. Ouguscht 2023 im Altersheim Lindehof in Langenthal
Höt hemer döfe is Altersheim Lindehof in Langenthal go Senge a de 1. Ouguscht fiiir.
Mer send so lieb Empfange worde vo de Corinne Zurbriggen, Sie het eus grad s Zemmer zeigt wo mer aui met eusem Dirigänt am Walter Stadlemann - Lötscher hend chöne go i Senge.
4 Lieder hemmer döfe Senge wärend de 1. Ouguscht red.
De Gescht ond Bewoner hez gloub guet gfaue, sie hend eus de emu no för e Zuegab useklatschet.
De hemmer no es sehr feins Znacht öbercho, verwönt semer aui worde, es esch mega fein gsii.
Mer danke am Lindehof nomou vo Härze för aues.
Schön esch es gsii, mer chöme gärn es andersmou weder.
Lg Sändy
S Jodlerfescht in Zug, soooo lang hemmer planget, güebt ond d Vorfreud esch gross gsiii, das mer a s Eidgenössische Jodlerfescht döfe of Zug. Es esch mega schöns Wätter gsiii a dem Samschtig, fasch e chli z Warm, aber besser weder Räge.
Am 17.Juni 2023 hämer am 12.20Uhr im Theatersaal vo Zug döfe starte.
Bem i Senge met eusem erfahrene Dirigänt Walter Stadelmann - Lötscher esch de d Aspannig scho chli me worde.
Vom Buchgfüehl här esch es guet gange, was de d Jurore meine das hämmer am Sonntig 18.Juni 2023 am 11fi Erfahre, i de Moderne Zit vo höt natürli ofem Web.
Soooo Freud hemmer 🙂 mer hend d Beschtnote 1 becho för euse Vortrag , Chomm Früehlig chomm, vom Walter Stadelmann - Lötscher.
das macht natürli Freud wenn mer för s vöu Probe so Belohnt wärde.
Stouz semmer aui druf, danke Walter för dini onermüedlechi Müeh das met eus z lehre.
Jez goz witer met üebe nach de Sommerferie för euses Chelekonzärt am 18.Novemer 2023 i de Geissbergchele in Langenthal of die 17.00Uhr.
Mer freue eus of Euch 😉
Met liebe Jodlergrüess
Sändy
![ejv_logo[1]](/.cm4all/uproc.php/0/.ejv_logo%5B1%5D.jpg/picture-200?_=15346c4cd00)
