Üses Reisli oder ä Tour mit e chli Apéro
Äs isch leider e relativ chlini Tschuppele gsy, wo sech am Samschtig am 23. Ougschte pünktlech am 8:00 am Bahnhof z Langetu igfunge het. Nach Inschtruktion düre Reiseführer und Organisator Poul Mettler isch es pär SBB nach Spiez gange. Nach Kafi und Gipfeli sy mer ar Chile verbi am Waudrand noche über de Räbbärge richtig See marschiert. Dert het's ä 1. Apéro mit Rosé us ere Langenthaler Wyhandlig gäh. Dr Abstig zum Schlos is stotzig gsy und em Einte oder Angere chli id Chnöi. Ir Bucht het's de erneut ä Apéro gäh, das Mou im Hotel Marina, wider e Rosé. Für die wo zöut hei, das wär de dr zwöit Apéro mit Petitesse zu schlemme gsy. Der Spaziergang am See noche nach Fulesee by wunderbarem Wätter isch es Erläbnis gsy und d' Blüemlisaup het sech z Fulesee ar Länti stouz zeigt (d Schiff, nid der Bärg). Zur moralische Ufrüschtig hei mer de dert no dr Tunersee gsunge, eine het sy Huet a Bode gleit und am Schluss vom Lied sy de 12 Stutz drin gläge. Di näschti Abteilig isch ä Kombination us Gschichtsunterricht und Feschtigsbesichtigung gsy. Spannend, das Artilleriewärch Fulesee. Und am Schluss, wär hät's dänkt, het's ä Apéro gäh - dr Dritt, diesmau Yvorne! Mit em ÖV nach Spiez is Chino - Restaurant isch ä Chatzsprung gsy, der het erhöht uf der Terrasse mit Blick übere See - dir erahnets nid - dr 4. Apéro gäh. Nach emene wunderbare Znacht isch's uf e Zug zrügg i d Heimat gange. We me de uf em Perron z Langetu die ungerschidleche Gangarte studiert het, sy die viu weniger elastisch gsy aus am Morge und es isch eim bewusst worde, dass aui über 18'000 Schritt glofe sy. Danke Poul für dä unvergässlich Tag!!
Üse Uftritt am Haslibrunnefescht vom 17. Augschte 2025
Am 09:15 hei mer pünktlech agfange dra z'schaffe, dass mer nid nume awäsend sondern ou richtig parat sy - das isch nid immer s'glyche und het nid by aune glych lang duret. Aber - und das isch die gueti Nachricht - wo am Zäni der Pfarrer Fluri agfange het, hei aui gschpannt syne töufsinnige Wort vo Einheit im Ungerschied und zäme geit aues besser und difiger ufgno. Mir hei nach der längere Feriepouse auwäg nid die Auzytbeschti Vorführig abgliferet, aber d'Lüt hei Freud gha und sehr wacker apploudiert. Dr Dirigänt Wauter het s'einte oder angere Mou chli zuckt, aber das het sech im Rahme ghaute. Es isch e sehr glungeni Fir gsy, het's my dünkt, nid nume wäg der engagierte Predig sondern ou wägem Rahmeprogramm. Das isch anmiert, farbefroh und tierlieb usgfaue. Bim Politapéro het's e Momänt duret, bis aui das mit de chlini und grosse Händ begriffe hei, wo der Stapi verkündet het. S'isch um d'Schliessig vor Gynäkologie gange, dasch de trotz usschweifende Metaphere irgendeinisch klar worde.
Hie no es par Idrück vo däm schöne Fescht:
d' HV vom 25. Jänner 2025
Es isch e stouzi Rundi gsi, wo sech am Samstig im Bad Gueteburg igfunde het. Die Aktive sy zimlech komplett awäsed gsy und d Freimitglieder ou. Der Res Bögli her einisch me s Fähnli vo de ehemalige aktive Ehremitglieder ufrächt ghaute und üse Rundi bericheret.
Ziemlech pünktlich hei d Dominique und der Janosch die Veranstautig eröffnet. Sy hei das Gschäftsjohr z Zwöite ab em Juni überbrückt, das sich nid immer eifach gsy und eigentlech sehr guet usecho.
Mir wei hie nid äs Wortprotokoll verfasse, aber die wichtige Sache söue ihre Platz ha.
Unger Mutatione hei mer 3 neue und sehr jungendlichi Mitglider chöne ufnäh und drüber orientiere, dass syt Churzem dr Julian Eggimaa no der 1. Tenor verstärkt.
Dr Johresbricht vo de 2 Co Präsidänte het dr Freud Usdruck gä, dass z Langnou s'dritte Mou i Foug d' Beschtnote 1 het chöne erreicht wärde. Aune isch klar gsy, dass ohne üses eigene aber ou s' Engegement vom Wauter Stadumah das Resultat nid so usgfaue wär.
Am 1. Ougschte hei mer ä regurächte Uftrittsmarathon absolviert - das isch für üs Öuteri ä rächti Herusforderig gsy. Am Schluss het aber d'Erinnerig a die gfreute Gsichter im Publikum aues angere i Hingergrund drängt, sogar die, vo der offizielle Fir ir Markthalle z' Langentau. Mir sy - und so steits i üse Statute, politisch neutral - aber d 1. Ougschte Fyr z Langentu isch gränzwärtig gsy. Ä Stadtrotspräsidäntin im Wahlkampfmodus und ä Betty Basler mit Beleidigunge us der ungerschte Schublade gäge verdiente Politiker - das het's gar nid brucht.
D' Finanzlag git nid grad Grund zur Freud, s'het wider es Defizit usegluegt. Aber d'Rächnig 2024 isch eistimmig agno worde und em Vorstand und Kassier isch Décharge erteilt worde.
U de isch gwählt worde: Mir hei wider e vouständige Vorstand und aui angere Charge sy ou bsetzt. Das macht richtig Freud. S' Dominique macht Präsidänti und wird vom Janosch aus Vize tatchräftig unterstützt. Gseht die hoffnigsvoui Truppe säuber.
S' Johresprogramm 25 isch verabschidet worde, eistimmig wei mer aui i d Länk - dänk, ou we mer Qualifikation für Basu scho z Langou ghout heit.
S' letschte Traktandum Ehrige het's i sech gha. Der Ruedi Meier isch mit 50 Johr eidg. Ehreveteran worde, das isch e rifi Leischtig. Und der Wauter Stadumah isch unger stürmischem Applous Ehremitglied vom JDQL worde, für usserordentlichi Leischtige wohl und bestens verdient.
Aues i auem isch es ä schöni und vom Bad Guteburg einisch me kulinarisch hervorragend begleiteti HV gsy.
S' Jodlerfescht vom BKJV in Langnou
Es isch e Schteiss gsy, weniger für üs Sänger aus für e Wauter Stadumaa. Zwar, und das isch beschtens z' verdanke, hei die letschte zwe Monet e höchi Disziplin bezüglech Probebsuech bewise, aber dr Tegscht vom "Aupfrüehlig" vom Hans W. Schneller het eifach nid so rächt i üsi Chöpf wöue. Es isch ou es ordelig originels Dütsch, wo dä J.J. Düsel (genau, so wie da Dichter heisst isch dä Tegscht) do i die Note ergosse het. Aber was am Expertisesinge in Bannwiu no nid ganz sattufescht isch gsy, muess üs am Vortrag i dr Chile z' Langnau am 15. Juni am 12:10 gar nid so schlächt glunge sy. Aber loset säuber:
Uf au Fäu isch de am Suntig z'läse gsy, dass mehr d' Beschtnote 1 übercho hei und im Jurorebricht het's no gäbig Pünkt gäh, 56.5. E chli stolz dörfe mer scho sy, weme dänkt was mer z'Wange kassiert hei und jetzt in Ins, Zug und Langnou drü mou hingerenang es 1. Aber üs isch es aune klar, ohni Wauter Stadumaa wär das äuwä chum glunge. Drum Wauter, härzleche Dank !!!!! und ou aune Meitschi und Jünglinge, wo sech würklech hervorragend engagiert hei und z' Langnou ou gliferet hei. So macht's richtig Freud.
Und hie no es paar Idrück:
Weihnachtshöck JDQL 2023
Restaurant Schwendi, Graben
Kirchenkonzert Jodler Doppelquartett Langenthal vom 18. November 2023
Schön esch euses Chelekonzärt gsii am Samschtig, de Gaschtklub ond das darf me säge, oder besser schribe, eusi mettlerwile liebe Kammeradinne ond Kammeral de vom Jodlerklub Roggliswil. Schöni Lieder hemmer vortreit i beidne Klüb, ou e Vortrag vom Sextett vom Roggliswiler Klub hez no gä, de het no 2i mou e Gsammtchor gsonge, das esch scho grad es Vollume gsii met 38 Sänger ond Juzer.
De Sandro Rieder het eus of de Cheleorgele begleitet, Sandro danke 1000 :-) es esch so cool gsii met Der ond Der döfe zue z lose, gärn es andersmou weder.
Ou de Franz Flückiger het met sine Kammerade of de Handorgele euses Konzärt bericheret, i de Chele ond im Forum Geissbärg, danke ou der Franz ond dine Kammerade es esch schön gsii met euch.
Nachem Konzärt esch es de zom gmüetleche Teil öbere gange, met Spies ond Trank ond Gsang, schön esch es gsii. Danke liebi Kammeradinne ond Kammerade vellecht benere andere Glägeheit weder, das wördi s Jodler Doppelquartett sehr freue.
Liebi Jodlergrüess
Sändy
Jodler - Reise vom 27. August 2023
Am Schriberling isch es überloh gsy, die Reis z'organisiere. Mit dr Nöchi zum Wy isch do schnäu einisch es Programm zwäggstiflet gsy. S' Wadtland oder genauer d' Lavaux isch aus Ziu feschtgschtange. Mit em Car sy mer de nid rassig aber gmüetlech nach Cully gfahre, wo im Major Davel es verspätets Gaffee und Gipfeli gwartet hei.
Mir hei üsi Fründe vo JK Roggliswil drby gha, si hei das verdient, hei si üs doch s'ganze Johr unterstützt. Vo Cully isch es de nach Chexbres gange. D Madame Chhristelle Conne het üs i ihrem Wyguet Cave Champs de Close empfange. Die Degustation isch begleite gsy vonere Plat de Cruditées, s'isch ou nötig gsy, wiu die feine Chasselas vom eifachere Jazz, über e St. Saph bis zum Dézaley hätte n'is bau umghoue. Mir sy de, für wider klari Chöpf z'übercho, vo Chexbres nach Cully gmarschiert. Die veranschlagte 25 Minute sy ender knapp gsy, do het der Reiseführer es chlises mathematisches Problem gha. Aber aui sy (zum Teil zimlech erlächnet) gsung in Cully i Bus igstige.
Die nächschti Station isch Chaplins World gsy. Nid aui hei der Rundgang absolviert, chönt am öppis läneger Spaziergang dür d'Wybärge gläge sy. Zwo Stunde sy klar zwenig, aber en erschte Idruck hei aui gwunne und vielech chunt der Eint oder Anger es angers Mou zrügg. Dr Wärt isch es unbedingt.
Die nächschti Ettappe isch Greyerz gsii. I der Auberge de la Hall het's es Fundu gä und die Routinierte wieder es Glessli Wy. Müed aber zfride sy mer de churz nach de achte wider im Oberaargau acho - I hoffe es heiges aui gnosse.
Auftritt im Meilenstein 20.08.2023
Höt hend mer dörfe im Meilestein in Langethal am Brunch Senge. Mer hend 3 Uftrett gha, a 2 Lieder. Brunche hend mer ou no döfe i de Pause, mer hend Förschtlech gässe, es het aues gha was s Härz begehrt. Danke nomou a dere Stöu am Team vom Meilestein för aues.
Mer döfe am 22. Oktober 2023 nomou go Senge am Brunch.
Liebi Grüess
Sändych
Haslibrunnen - Gottesdienscht
Schöön esch es gsii am Gottesdienscht im Haslibronne z Langethal döfe z Senge. Gstartet händ mer met em Lied, D Lüt im Dorf do het die einti ond anderi Bewohnerinn ond Bewoner vom Haslibronne chli Träne i de Ouge gha. Weme am Text zuelost, de het me de scho öpe mou Erennerige a d Jugendzit!! S letschte Lied wo mer händ dörfe Senge esch e Gschänkte Tag gsii, i ha vöu Bewonerinne ond Bewoner gse met em Chopf neke, i dem Auter esch e Gschänkte Tag sooo wärtvou. Mer hend ou vöu schöni Komplimänt öbercho vo de Bewonerinne ond Bewoner, för euse Gsang das freut eus emmer bsondrig. Verwönt semmer de ou no worde, mer hend döfe nachem Uftrett Zmettagässe, es het e grossi Uswau gha ond esch sehr fein gsii.
Danke nomou of dem Wäg as Haslibronne Team för aues.
Mer chöme sehr gärn weder.
Liebi Grüess
Sändy
1. Ouguscht 2023 im Altersheim Lindehof in Langenthal
Höt hemer döfe is Altersheim Lindehof in Langenthal go Senge a de 1. Ouguscht fiiir. Mer send so lieb Empfange worde vo de Corinne Zurbriggen, Sie het eus grad s Zemmer zeigt wo mer aui met eusem Dirigänt am Walter Stadlemann - Lötscher hend chöne go i Senge. 4 Lieder hemmer döfe Senge wärend de 1. Ouguscht red. De Gescht ond Bewoner hez gloub guet gfaue, sie hend eus de emu no för e Zuegab useklatschet.
Mer danke am Lindehof nomou vo Härze för aues.
Schön esch es gsii, mer chöme gärn es andersmou weder.
Lg Sändy
soooo lang hemmer planget, güebt ond d Vorfreud esch gross gsiii, das mer a s Eidgenössische Jodlerfescht döfe of Zug. Es esch mega schöns Wätter gsiii a dem Samschtig, fasch e chli z Warm, aber besser weder Räge. Am 17.Juni 2023 hämer am 12.20Uhr im Theatersaal vo Zug döfe starte.
Bem i Senge met eusem erfahrene Dirigänt Walter Stadelmann - Lötscher esch de d Aspannig scho chli me worde. Vom Buchgfüehl här esch es guet gange, was de d Jurore meine das hämmer am Sonntig 18.Juni 2023 am 11fi Erfahre, i de Moderne Zit vo höt natürli ofem Web.
Soooo Freud hemmer 🙂 mer hend d Beschtnote 1 becho för euse Vortrag , Chomm Früehlig chomm, vom Walter Stadelmann - Lötscher.
das macht natürli Freud wenn mer för s vöu Probe so Belohnt wärde. Stouz semmer aui druf, danke Walter för dini onermüedlechi Müeh das met eus z lehre.
Jez goz witer met üebe nach de Sommerferie för euses Chelekonzärt am 18.Novemer 2023 i de Geissbergchele in Langenthal of die 17.00Uhr.
Mer freue eus of Euch 😉
Met liebe Jodlergrüess
Sändy
